മഴ

മഴ...

മനസ്സിൽ പ്രണയം ഉണർത്തുന്ന ഒരു അനുഭൂതി.
മഴ എന്നും എനിക്ക് പ്രിയപ്പെട്ടതാണ്.
ചിന്തകളാൽ കലുഷിതമായ മനസ്സിൽ ഒരു കുളിരായി അവൾ പെയ്തിറങ്ങുന്നു.
നനുത്ത ഇലനാമ്പുകളിലൂടെ ഇറ്റു വീഴുന്ന ചെറുതുള്ളികൾ കുഞ്ഞു ചെടികളെ നാണത്തിൽ പുതച്ചിരുത്തുന്നു.
വേനലിൽ ഒരു നേർത്ത സ്പർശ്ശമായി അവൾ എത്തുന്നു.

മഴ എല്ലാവർക്കും ഇഷ്ടമാണ്.
നനുത്ത മഴയുടെ കുളിരിൽ അമ്മയുടെ കണ്ണു വെട്ടിച്ചു കളിക്കാനിറങ്ങുന്ന കുഞ്ഞുങ്ങളെ കണ്ടിട്ടില്ലേ?
അവിടെ ഒരു കുടക്കീഴിൽ അവളുടെ കൈ പിടിച്ചു അവൻ നടന്നു പോകുന്നു.
അവരെ പിരിക്കാതെ കയ്യോടു കൈ ചേർത്തു ഒന്നാക്കിയത് ഈ മഴ തന്നെ.

കോരിച്ചൊരിയുന്ന മഴയിൽ കൂടണയാൻ പറക്കുന്ന കിളികൾ.
ഈ ധൃതിയിലും അവർ ഈ മഴ ആസ്വദിക്കുന്നുണ്ടാകും.

ആർക്കാണ് മഴ ഇഷ്ടമല്ലാത്തത്? നിനക്കും ഇഷ്ടമല്ലേ മഴ?
എരിയുന്ന ഈ ചൂടിൽ ഒരു മഴ പെയ്തിരുന്നെങ്കിൽ എന്ന് നീയും ഇപ്പോൾ ആഗ്രഹിക്കുന്നില്ലേ?

അതെ, എല്ലാവർക്കും മഴ ഇഷ്ടമാണ്.
എനിക്കും മഴ ഇഷ്ടമാണ്...